يا هوى الروح دمعي من عيوني يفيض
والسبايب تراها كلها من جنابك
والله اني مريضٍ يوم قالوا مريض
صابني كالذي يا ناعم العود صابك
ما ترى باس يا راعي الشباب الغضيض
وا عسى الله يسلم يا حبيبي شبابك
الشباب اللي من ادنات شيٍ يغيض
وا عسى الله يحط العافية كلها بك
المحبة لها شانٍ طويلٍ عريض
ما بكت عيني إلا من كثير الغلا بك
ودي اني على شانك حفيظٍ حفيظ
كل ما جاك شيٍ ليتني في ثيابك
راعي الزين مثلك ما يصير البغيض
كل ما جيت مع باب لقيت الوفى بك
خاطري يا حبيبي كل يومٍ يهيض
ويلي وان طال عني يا حبيبي غيابك
كل ليلة وانا في هجعتي وتغميض
ودي انشدك عن حالك ولكن اهابك
يا بعد روحي اسمع هرجتي لا تريض
واذكر اللي تعذر من سبايب عذابك
شفت عنك ملابس بين شتوه وقيض
واحسن اللبس منهن ما يهدي اعصابك
الحلاوه كثيره بين سودٍ وبيض
ما عرفنا الحلا فيهن او ان الحلا بك
ما عن اللي يحب القلب شيٍ يعيض
والخواطر على زين الطبايع تشابك