آه وا قلبي اللي علته من وليفه
وين ابلقى دوى للعله اللي خفيّه
اشهد انه ذبحني ريم وادي حنيفه
ليه يا ريم تذبحني بليّا خطيّه
ريم يا ريم شوفك عند قلبي وريفه
مثل عيد رْمضان او مثل عيد الضحيّه
يا حبيبي ترى روح المولع صخيفه
لو بغا الصبر ساعة مامعاه مقدريّه
وا هني المعافا اللي حموله خفيفه
ما سطى به هوى المجمول صافي الثنيّه
إن رحمني مْجَمَل وان ذبحني بكيفه
حين شفته وقلبي راكبٍ اردعيّه
الموده تراها يا حبيبي كليفه
باين النقص في حالي وعيني شقيّه
ما ربى بالحجاز ولا ربي في الحليفه
من عرفته وهو في وسط نجد العذيّه
الشقا والعنى من بيننا بالنصيفه
خل روحي وروحك كلهن بالسويّه
من قناة السويس الى بلاد الخليفة
ومن الاردن الى صنعاء قليلٍ حليّه