يكفي غلا يا غلا ياللي عليّ غالي
يكفي عيوني من عيونك مْعنيها
ابيك تنظر لحالي يا بعد حالي
لجلك عيوني تهامل منك واخفيها
يا روح روحي ترى ماغبت عن بالي
وايامنا اللي مضت مانيب ناسيها
إن غبت عني يهل الدمع همالي
وان صرت عندي تنَور لي لياليها
ياللي دلالك غريب اشكال والواني
روحي وروحك وداعه وانت راعيها
خيال حبك بنى بالقلب تمثالي
حرام تهدم حياتي وانت بانيها
يا ليت لي حيلةٍ في الوصل واحتالي
كل الجدا عبرتي والنفس امنيها
تقول عزاه لي وأقول عزالي
متى متى يا ترى اللوعات ننهيها
متى الليالي بتصفى لك وتصفى لي
متى المقادير تجمعنا بأياديها
يا لايمي في المحبه مالك ومالي
هذي اسرار الهوى ما يدّْخل فيها